Kjærastefotografering på finaste Herdla

Ein nydeleg sommarkveld – heilt vindstille, varmt og med ei kjensle som berre sommaren kan gi. Paret hadde planlagd ei heil utflykt med utgangspunkt i fotograferinga. Dei hadde med seg tursekk, telt, vin og god mat. Dei skulle bli verande på Herdla for natta og kose seg under stjernehimmelen etterpå.

Me starta fotograferinga med å vandre langs stiane, der kveldssola kasta eit varmt lys over landskapet. Dei lo og småprata medan me stoppa undervegs på stien til teltplassen. Me fokuserte på å fange dei små, fine augneblikka mellom dei. Dei var avslappa og til stades, og det var som om kameraet berre blei ein del av kvelden. Å fotografere dei i dette miljøet, midt i det dei elska å gjere saman, gjorde bileta ekstra personlege – det var ikkje berre ei fotografering, men ein del av ei minnerik oppleving.